គ្រប់​គ្នា​នាំគ្នា​ស្វាគមន៍​ការ​បរាជ័យ ប៉ុន្តែវាពិតជាអ្វី ​ដែល​យើង​គួរតែស្វាគមន៍មែនឬអត់?

អត្ថបទដោយ៖ ខុន សក្ក័ដា

We embrace failure featured image.jpgPhoto by Steve Halama on Unsplash

ពេល​បើក​មើល​បណ្ដាញសង្គមនៅលើទំព័រដែលផ្តោតលើការ​ជម្រុញទឹកចិត្ត​ ឬបណ្ដុះផ្នត់​គំនិត​ផ្សេងៗ ច្រើន​តែ​ឃើញ​គេ​នាំគ្នា​ឲ្យ​តម្លៃខ្ពស់ទៅ​លើ​ការ​បរាជ័យ​ ដែលធ្វើឲ្យគ្រប់គ្នាចូលចិត្តសម្តីនោះ​ ចង់សាក ចិត្ត​សឿង​នឹង​បរាជ័យ​ទៅតាម​ទំនោរដូច្នោះដែរ។

ពួកគេ​ចាប់​ផ្ដើម​ធ្វើ​អ្វីដែល​គេចង់​ធ្វើ​ ដោយមិនខ្វល់​ខ្វាយ​ពីសម្ដីរបស់អ្នកដទៃ។ ពេលខ្លះទៅ ឲ្យ​តែ​សម្ដីរបស់ អ្នកដទៃ​ឃ្នើស​នឹងចិត្ត​គំនិត​របស់​គេបន្តិច ក៏មាន​អារម្មណ៍ថាធុញទ្រាន់ ​យល់​ថា​សម្តីនោះគ្មានបានការ ការគិតរបស់អ្នកដទៃ​មិនដល់​ពួក​គេ ឬក៏អ្នកថាបានតែថា។

ពិត​ណាស់​ថា​មិនមែនគ្រប់​គ្នា​សុទ្ធ​តែ​ចង់​ឃើញអ្នក​ល្អជាងគេទេ តែ​ក៏មិនមែនមានន័យថា​ គ្មានអ្នក​ដែល​ ខ្វល់​ពីអ្នកដែរ ដោយ​ពេលខ្លះទៅគេនិយាយ គេថា គេស្ដីឲ្យក៏ព្រោះតែ​គេ​បារម្ភ​ពីអ្នក​ មិនចង់​ឲ្យ​អ្នក​ជួប ​បញ្ហា​លំបាក​ ឬដើរ​ផ្លូវ​ខុស ហើយ​ពួកគេ​ទាំង​នោះភាគច្រើន​ជាមនុស្ស​ដែល​ស្រឡាញ់អ្នកពិតប្រាកដ ដែលអាចថាជាម្ដាយឪពុក បង​ប្អូន ឬកល្យាណមិត្ត​។

ឧទាហរណ៍ខ្លះៗ អ្នក​អាច​នឹងមាន​អារម្មណ៍ខឹង​អ្នក​ផ្ទះ ឬមិត្ត​ភក្តិ​អ្នក​នៅពេល​ពួកគាត់​រិះគន់អ្នក​ពីគំនិត ​ដែល​អ្នក​ចង់​ចេញរកស៊ីផ្ទាល់​ខ្លួន ឬក៏រត់​ទៅរៀន​ជំនាញ​ផ្សេងទៀតដែល​គាត់មើល​មិនឃើញថា​វានឹង ​ជួយ​អ្នក​នៅពេល​អនាគត តែ​អ្វីដែលអ្នក​គួរធ្វើវិញ​​នោះ​គឺ​យកយោបល់​គាត់មកពិចារណាថា​វាដូចអ្វីដែល គាត់​និយាយ​មែន ឬអត់ ហានិភ័យខ្ពស់​ប៉ុ​ណ្ណា ហើយ​រៀប​ចំគម្រោង​ឲ្យ​ច្បាស់់លាស់​។ ​ ពេលខ្លះទៅ ការគិត​របស់​អ្នក​នៅមាន​ចន្លោះខ្វះខាត​បន្តិច​បន្តួច​ដែលអ្នក​ភ្លេច​ខ្លួនមិនបានមើលឃើញ។

អ្នក​ប្រាកដជាធ្លាប់​ឮហើយ​ពីជីវប្រវត្តិ​តស៊ូ រឿង​បរាជ័យ​ច្រើន​រឿង​របស់អ្នក​និពន្ធ​ល្បីល្ប្ាញ J.K. Rowling ឬក​៏សម្រង់សម្ដីរបស់ Thomas A.Edison តែពួកគាត់​ជាមនុស្ស​ម្នាក់​ក្នុង​ចំណោម​មនុស្ស​រាប់​លាន​នាក់ ប៉ុណ្ណោះដែលទទួលបានជោគជ័យ ឯអ្នកផ្សេងទៀតអាចនឹង​ទទួល​បរាជ័យ នៅតែគ្មានអ្នកណាទទួល​ ស្គាល់​។

ប្រាកដហើយ ការបរាជ័យ​​​ ឬការដែល​ដើរ​ដួល ​វាមិនមានអ្វីគួរ​ឲ្យ​ខ្លាចនោះទេ។ ដួលងើបៗ! មាន​អីទៅ ពិបាក តែអ្វីដែល​គេ​ខ្លាច​បំផុតនោះគឺការ​ដែល​បរាជ័​យ​រហូត​ទាល់​តែងើប​លែង​កើត​ បរាជ័យ​រហូត​ទាល់​តែ​ អ្នករាង​ចាល ឈប់​ចង់​ធ្វើ​អ្វីទៀត មានវិបត្តិ​ផ្លូវ​ចិត្ត ឬក៏​បាក់ស្បាត​តែម្ដង។

ចង់ជោគជ័យ​ត្រូវ​តែ​ប្រថុយប្រថាន​ តែ​ការ​ប្រថុយ​ប្រថាននោះជា​ការ​ប្រថុយ​ប្រថាន​ដែល​ឈ្លាស​វៃ​ ប្រកប​ដោយ​បញ្ញា មានគម្រោង​ច្បាស់លាស់ បើអាច​ ចៀសវាង​ការដើរ​មួយជំហាន​គិត​មួយជំហាន​ មិនមែនជាការ​ដែល​នឹក​ឃើញម្ដង​ចង់​ធ្វើ​នេះ ម្ដង​ចង់​ធ្វើ​នោះ ចុង​ក្រោយ​សម្រេច​សម្រួច​ទៅរក​លទ្ធ​ផល ជាដុំកំភួន​មិនឃើញ។

អត្ថបទខ្លីមួយ​នេះមិន​មែនជា​ការ​បំបាក់ទឹក​ចិត្ត​ឲ្យ​អ្នក​រួញរា​មិនចេញទៅធ្វើ​អ្វីដែល​អ្នក​ចង់​ធ្វើ​នោះទេ តែ​ជា ​ការ​ដាស់​តឿនបន្តិចបន្តួច​ ឲ្យ​អ្នក​មាន​ការពិចារណាច្បាស់លាស់ មុននឹងប្រថុយប្រថានដើម្បីទទួល​បាន ​លទ្ធផល​គាប់​ប្រសើរ។

មិន​មាន​នរណាម្នាក់​អាច​មក​កំណត់​ផ្លូវ​ដើរ​របស់​អ្នក​នោះទេ មានតែអ្នក​នេះហើយ​ដែល​កំណត់​វាដោយ ខ្លួនឯង។ ចាត់​ទុកសម្ដីអ្នកដទៃ​ដូចជា​ការ​ប្រឹក្សា​យោបល់​ដោយឥតគិត​ថ្លៃទៅ ព្រោះពេលខ្លះពួកគេ ​ទាំង​នោះក៏និយាយ​ត្រូវ​ដែរ។

បរាជ័យ​គ្មាន​អ្វីគួរ​ឲ្យខ្លាចនោះទេ តែ​ការ​បរាជ័យ​រហូត​ដល់​ងើប​វិញមិនរួច​ទើ​ប​អ្នក​ត្រូវ​ខ្លាច​។

 

ទស្សនៈយល់ដែលបង្ហាញនៅទីនេះ គឺជាទស្សនៈយល់ឃើញរបស់អ្នកនិពន្ធ និងមិនតំណាង ឬឆ្លុះបញ្ចាំងពីទស្សនៈយល់ឃើញរបស់យូនីសេហ្វ។

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s