ផឹកស្រាមិនអាចបំបាត់ទុក្ខបានទេ

ដោយ៖ សុខ រិទ្ធា

Flaming_cocktails.jpg© Nik Frey (niksan)/ 2004/ Licensed under CC By 2.5

បន្ទាប់ពីបានជួបប្រទះ និងប្រឈមមុខជាមួយបញ្ហាជាច្រើនពេញមួយថ្ងៃ មនុស្សមួយចំនួនប្រហែលជាចង់ ទៅផឹកគ្រឿងស្រវឹងមួយដបពីរដបនៅពេលល្ងាច ឬយប់ដើម្បីកាត់បន្ថយភាពស្មុគស្មាញ និងក្តីកង្វល់របស់ ខ្លួន។ នៅពេលមានទុក្ខកង្វល់ច្រើន ពួកគេអាចនឹងផឹកគ្រឿងស្រវឹងកាន់តែច្រើនដោយគិតថាគ្រឿង ស្រវឹងច្រើនទើបអាចកាត់បន្ថយទុក្ខកង្វល់ដែលគេកំពុងមានបាន។ មនុស្សមួយចំនួនទៀតក៏បានប្រែក្លាយ ជាមានទម្លាប់ផឹកគ្រឿងស្រវឹងជាប្រចាំដើម្បីជាការសម្រួលដល់អារម្មណ៍មិនល្អក្នុងចិត្តរបស់ពួកគេ។ ទាំងនេះកើតឡើងដោយសារការយល់ថា «ផឹកស្រាបំបាត់ទុក្ខ»។

ពាក្យ «ផឹកស្រាបំបាត់ទុក្ខ» មិនមែនជាពាក្យថ្មីទេ ផ្ទុយទៅវិញ វាគឺជាពាក្យដែលគេតែងតែនិយាយ។ ការគិត បែបនេះបានធ្វើឲ្យមនុស្សមួយចំនួន ជ្រើសរើសយកការផឹកស្រាធ្វើជាដំណោះស្រាយនៃការកើតទុក្ខរបស់ខ្លួន។ យើងគួរបញ្ឈប់ការនិយាយ និងការគិតបែបនេះហើយ ព្រោះតាមពិតទៅ ផឹកស្រាមិនអាចបំបាត់ទុក្ខបានទេ។ ស្រាមិនត្រឹមតែមិនអាចបំបាត់ទុក្ខបានទេ វាថែមទាំងបង្កើនទុក្ខ និងផលប៉ះពាល់អវិជ្ជមានជាច្រើនដល់ អ្នកផឹកវិញទៀតផង។

គ្រឿងស្រវឹងប៉ះពាល់ដល់សុខភាពផ្លូវចិត្ត

ការផឹកគ្រឿងស្រវឹងច្រើននិងជាប្រចាំផ្តល់ផលប៉ះពាល់ដល់ផ្នែកខួរក្បាល(ប្រព័ន្ធប្រសាទ)ជាច្រើន ដែលអាចនឹងបង្កើតបានទៅជាជំងឺធ្លាក់ទឹកចិត្ត(depression) ការថប់អារម្មណ៍(anxiety) និង ការតានតឹងក្នុងអារម្មណ៍(stress)។   លើសពីនេះទៀត​ គ្រឿងស្រវឹងក៏ធ្វើឲ្យសមត្ថភាពនៃការចងចាំ ធ្លាក់ចុះដែរ ហើយនៅពេលផឹកគ្រឿងស្រវឹង សមត្ថភាពនៃការសង្កេតពីទិដ្ឋភាពជុំវិញនិងការគិតពិចារណា ក៏នឹងធ្លាក់ចុះផងដែរ។

aaron-blanco-tejedor-768029-unsplash.jpgPhoto by Aarón Blanco Tejedor on Unsplash

គ្រឿងស្រវឹងក៏មានផលប៉ះពាល់ដល់ដំណេកផងដែរ។ មនុស្សដែលផឹកគ្រឿងស្រវឹងនឹងប្រឈមនឹងការដេក មិនបានស្កប់ស្កល់ដែលនឹងនាំឲ្យគេនឿយហត់អស់កំលាំងនៅថ្ងៃបន្ទាប់។ ជាងនេះទៅទៀត ការដេកមិនបាន ស្កប់ស្កល់នេះក៏នាំឲ្យកើតជំងឺធ្លាក់ទឹកចិត្ត ការថប់អារម្មណ៍​ និងបញ្ហាផ្លូវចិត្តផេ្សងៗទៀតផងដែរ។

គ្រឿងស្រវឹងប៉ះពាល់ដល់សុខភាពរាងកាយ

ក្រៅពីផ្តល់ផលប៉ះពាល់ជាច្រើនដល់សុខភាពផ្លូវចិត្ត គ្រឿងស្រវឹងក៏ផ្តល់ផលអវិជ្ជមានជាច្រើនដល់សុខភាព ផ្លូវកាយ​ផងដែរ ដូចជាការនាំឲ្យកើតជំងឺបេះដូង ថ្លើម លំពែង និងទឹកនោមផ្អែម។ ល។

ការផឹកគ្រឿងស្រវឹងច្រើនធ្វើឲ្យសុខភាពបេះដូងចុះខ្សោយ។ លំហូរនៃការបញ្ជូនអុកស៊ីសែន និងជីវជាតិចិញ្ចឹម រវាងបេះដូង និងសរីរាង្គដទៃទៀតនឹងរងការប៉ះពាល់​។​  ផលប៉ះពាល់ជំហានដំបូងអាចមានដូចជា សំពាធឈាមឡើងខ្អស់ និងចង្វាក់បេះដូចមិនទៀងទាត់​​ ហើយវានឹងនាំឲ្យកើតជាបញ្ហាជាច្រើនទៀត នៅពេលខាងមុខ។  បន្ថែមលើនេះទៀត  កម្រិតនៃTriglyceride(ប្រភេទនៃជាតិខ្លាញ់ក្នុងឈាម) ក៏អាចនឹងកើនឡើងខ្ពស់ដោយសារការផឹកគ្រឿងស្រវឹងច្រើនផងដែរ ហើយវាអាចបង្កទៅជាជំងឺបេះដូង និងទឹកនោមផ្អែម។ វាក៏អាចបង្កជាការគាំងបេះដូងភ្លាមៗ(sudden cardiac death) ផងដែរ។

គ្រឿងស្រវឹងក៏ជាកត្តាដែលនាំឲ្យកើតជំងឺថ្លើម និងលំពែងដែរ។ ការផឹកគ្រឿងស្រវឹងច្រើនធ្វើឲ្យប៉ះពាល់ ធ្ងន់ធ្ងរដល់ដំណើរការរបស់ថ្លើម ហើយក្នុងរយៈពេលយូរ វានឹងបង្កជាជំងឺថ្លើមដែលពិបាកនឹងព្យាបាល និងអាចប៉ះពាល់ដល់អាយុជីវិតទៀតផង។ មួយវិញទៀត ការផឹកគ្រឿងស្រវឹងជាប្រចាំក្នុងរយៈយូរឆ្នាំក៏ នឹងធ្វើឲ្យសុខភាពលំពែងចុះអន់ថយផងដែរ។   បញ្ហាលំពែងជាច្រើនមិនបញ្ចេញអាការៈឲ្យដឹងទេពេលនៅ ដំណាក់កាលដំបូង ហើយនេះនាំឲ្យអ្នកជំងឺមិនអាចធ្វើការព្យាបាលទាន់ពេលនៅស្រាល។ ការបន្តផឹក គ្រឿងស្រវឹងច្រើននឹងបង្កទៅជាជំងឺមហារីកលំពែងទៀតផង ហើយវាជាមហារីកម្យ៉ាងដែលរីករាលដាល លឿន និងមានគ្រោះថ្នាក់ខ្លាំង។

rawpixel-740328-unsplash.jpgPhoto by rawpixel on Unsplash

មួយថ្ងៃមួយកែវ (ឬមួយកំប៉ុង) ក៏មានបញ្ហាដែរ

មានការនិយាយតៗគ្នា និងមានអត្ថបទជាច្រើនដែលលើកឡើងថាការផឹកស្រា (ឬស្រាបៀរ)មួយថ្ងៃមួយដប (ឬមួយកែវ) អាចនាំឲ្យមានសុខភាពល្អ​ ក៏ប៉ុន្តែ តាមការសិក្សាស្រាវជ្រាវមួយដែលបានចុះផ្សាយថ្មីៗនេះលើ ទិនានុប្បវត្តិ(journal) វេជ្ជសាស្រ្ត The Lancet​  បានបង្ហាញថា “គ្រឿងស្រវឹងគ្មានបរិមាណសុវត្ថិភាព(ល្អ)ទេ”។​ នេះមានន័យថា ការផឹកគ្រឿងស្រវឹងតិច ឬច្រើន (ឬមួយថ្ងៃមួយកែវ) សុទ្ធតែអាចប៉ះពាល់ដល់សុខភាព និង នាំឲ្យកើតជំងឺផ្សេងៗ។

សរុបសេចក្តីមក ចូរបញ្ឈប់ការនិយាយ ឬការជ្រើសរើសយកការ “ផឹកស្រាដើម្បីបំបាត់ទុក្ខ”​ ទៀត​ ព្រោះវាមិន ពិត និងមិនត្រឹមត្រូវ។ ការផឹកគ្រឿងស្រវឹងគឺដូចជាការចាក់ទឹកអាល់កុលម្យ៉ាង ដែលផ្តល់ផលប៉ះពាល់អាក្រក់ ដល់សុខភាពរាងកាយ និងផ្លូវចិត្ត​ ចូលទៅក្នុងខ្លួនអញ្ចឹង។​ វាមិនបានបំបាត់ទុក្ខទេ ផ្ទុយទៅវិញ វាបង្កើនទុក្ខ ទៅវិញទេ។ ដូចនេះ​ ការជ្រើសរើសយកការផឹកគ្រឿងស្រវឹងដើម្បីបំបាត់ទុក្ខគឺជាជម្រើសដ៏អាក្រក់បំផុត មួយ។​

 

ទស្សន:ដែលបញ្ចេញនៅក្នុងអត្ថបទប្លុកនេះ⁣ ជារបស់អ្នកសរសេរ ហើយមិនបង្ហាញរឺឆ្លុះបញ្ចាំងទស្សន:របស់ UNICEF ឡើយ។

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s